राख

 

आपले आपण | रुजविता स्वप्न

त्यात होई मग्न | अंतर्मन ||

विश्वास आधार  |  विश्वास आचार

विश्वासाचा भार | सर्वथैव ||

शब्द शोधू जाता  |  कैक गवसती

शब्द फोफावती  |  अमर्याद ||

अदृश्य तरीही  |  मजबूत पाया

अन्य तर्क वाया  |  अर्थाअर्थी  ||

भावना भिजते  |  भावना रुजते

भावना थिजते  |  खोलवर ||

मात्र जाणवे ना | भावनेचा पाया

तर्क भ्रमवाया |  सिद्ध नित्य ||

शब्दाच्या जादूची | तर्कास झालर

युक्तिवाद थोर |  भासे सत्य ||

स्वतास स्वताचे  |  मन उमगेना

त्यात शब्द नाना  |  धुमसती ||

दडलेले हिंस्त्र  |  श्वापद जिवात

दबकत आत  |  वावरते ||

चाणाक्ष चतुर | राहतात धूर्त

फक्त निरखत | इतरांस ||

निरखूनी सारी  |  अदृश्य श्वापदे

एक एक प्यादे  |  हालविती ||

शब्दांच्या ठिणग्या | शब्दांचे इंधन

वेळीच टाकून | पेटविती ||

समाज घडती | समाज सडती

समाज जळती | यथाकाल ||

राख राखेवर | थरावर थर

दाह निरंतर | चालतोच ||

कुणीही काहीही | स्वप्न रुजविणे

इतकेच लेणे | जगण्याला ||

- निलेश पंडित

२४ मार्च २०२२