स्वच्छ व सुंदर रंगविलेल्या भिंती
तलम व ताजी हिरवळ अवतीभवती
... रांगोळी रेखीव छान द्वाराशी
कणभर हळदी, कुंकू तिजवर सजती
अहोरात्र कसलीशी वर्दळ असते
मंदसुगंधी अत्तर हवेत तरते
... टाळ नि टाळ्यांचा रव पडतो कानी
गूढ अनामिक माया मोहित करते
सुखशांती समृद्धी शुचिता भक्ती
पवित्र मंगल पुण्य मोक्ष वा मुक्ती
... रेलचेल शब्दांची मौलिक साऱ्या
अगतिकतेला शक्तीची आसक्ती
युगेयुगे ह्या वास्तूची ही महती
आत जरी किंकाळ्या दबती विरती
- निलेश पंडित
२९ डिसेंबर २०२२
कोणत्याही टिप्पण्या नाहीत:
टिप्पणी पोस्ट करा