स्वप्न पडले पाकळीला
पाकळी स्वप्नात फुलते फूल झाली
अन् सकाळी ऊन पडता
तप्त स्पर्शाने उन्हाच्या जाग आली
जसजसा चढला दिवस .. ती
होरपळली … तसतसा बाजार भरला
पाकळीने गाठला तळ
वाळली, निष्प्राण झाली … दिवस सरला
भाग होती ती फुलांचा
फूल नव्हते मात्र फुलते कोणतेही
जगरहाटी ज्ञात नव्हती
स्वप्न मनभर फुलत गेले … झीज देही
लाभले दवथेंब थोडे
देत गेले ऊब, माया, सौख्य काही
आज पाचोळ्यात दिसती
पाकळीवर पुसटसे त्यांचे ठसेही
- निलेश पंडित
३० जुलै २०२३
कोणत्याही टिप्पण्या नाहीत:
टिप्पणी पोस्ट करा