(वृत्तः भामिनी)
आतल्या आत कल्लोळ काही
चाललेला जरी बारमाही
… आक्रसे चेहरा हासताना
हास्यमुद्रा ठळक दृश्यदेही
लखलखाटातला काळ गेला
मात्र तो आठवे रोज त्याला
… जीवघेणी नशा साद देई
आणि निर्जीवशी स्वप्नमाला
आगळे वेगळे खास होते
वेदनांचे तिथे फास होते
… कस्तुरीचा जसा गंध होता
कोंडलेले जुने श्वास होते
वेगळा भासतो … मात्र नाही!
खुणवितो आत माझ्यातलाही
… जाणतो आणि दुर्लक्षितो मी
चुळबुळे आतल्या आत तोही!
- निलेश पंडित
५ सप्टेंबर २०२३
कोणत्याही टिप्पण्या नाहीत:
टिप्पणी पोस्ट करा