भुयार

जिथे जाईन तिथे

निरनिराळ्या भिंतीच असतात 

ज्या अडवतात 

अडथळा बनत 

कधी धडकून 

करतात जखमीही

तरीही धडका मारत 

फोडत तोडत कधी

तर कधी शोधत दरवाजे 

खिडक्याही

आपणच काढावेत मार्ग आपले

दालनं बदलण्याचे

शोधण्याचे 

मोकळी हवा

किंवा कधीकाळी गरज भासलीच

तर फक्त जीव वाचवण्यासाठी 

निवारा

ह्या मौलिक सामाजिक पारंपरिक

अटळ दृढ

शिकवणीतून केलेल्या संघर्षात 

थकून दोन क्षण बसलो

डोळे मिटले आणि ऐकला आवाज

स्वतःच्या श्वासांचा

अजमावली शक्ती

तसंच मर्यादा 

स्वतःच्या शरीराची 

आणि न्याहाळला भवताल 

तेव्हा जाणवला

टणक जमिनीखालील

भुसभुशीत गाभा

थोडंसं वाहतं पाणी 

लुकलुकती शक्यता

भुयारं खणण्याची

जी जाऊन भिडावीत

इतर भुयारांना

तशीच इतरत्र 

कुणी खणली असल्यास 

- निलेश पंडित

२२ फेब्रुवारी २०२५