"शेवटी ह्यातूनही होईल काही चांगले"
जे कुणी निवडून आले हेच केवळ बोलले
सुष्टदुष्टातील आता फरक कळतो नेमका
देव ते जे मारती अन् दैत्य ते जे मारले
'सर्व कर्तव्ये प्रजेची' तत्व हे आहे नवे
वापरे अधिकार सारे मात्र सत्ता आपले
सर्व खटले चालले साऱ्याच बाजूंचे इथे
फक्त त्यांनी मोजके साक्षीपुरावे दाबले
सूत्र न्यायाचे प्रभावी, स्पष्ट असते नेहमी
कोणते बाहेरचे अन् कोण आहे आतले
टीचभर जे लोक त्यांना माज येतो सारखा
हाच कांगावा करत बहुसंख्य सारे माजले
- निलेश पंडित
९ मे २०२१
कोणत्याही टिप्पण्या नाहीत:
टिप्पणी पोस्ट करा