स्थान

 

वेळ तर येणार आहे, वेदनाही अटळ आहे

त्यात मोठे गूढ असते दूर ती की जवळ आहे!

जगत जाणे भाग आहे कारणे नसताच कुठली

थांबणे केव्हातरी इतकेच कारण सबळ आहे

भेडसावत रोज जातो मार्ग खडतर चालताना

संपता यात्रा पुढे अज्ञातसा पण सरळ आहे

लाघवी तो हासतो हळुवार साधे बोलतोही

मात्र नंतर समजते ह्रदयात त्याच्या गरळ आहे

वाटते तर्कानुमानानेच केवळ बोलतो तो

पण मुळाशी कल्पनेची भावनेवर भुरळ आहे

शोध गूढाचाच आम्हीही सदोदित घेत जातो

संशयाचे स्थान शोधाच्या मुळाशी अढळ आहे

- निलेश पंडित

४ जुलै २०२१