दैव गेले करत रोजच संकटांची बेगमी
संकटांनी त्या दिले जगण्यास कारण नेहमी
काल होतो आज आहे अन् उद्या मी वेगळा
शोधण्यातच जन्म गेला त्यात नक्की कोण मी
शब्द वापरण्यात वाकबगार झालो नेमके
रोज अंतर्मुख तरीही होत गेलो मात्र मी
पाहिली संधी जिथे मी कष्ट तेथे ओतले
अडथळे आयुष्य गेले देत खडतर कायमी
काय खोटे वा खरे ह्याची कशाला काळजी
भुरळ जी पाडून जाते तीच उत्तम बातमी
न्याय अन्यायात गुरफटलो सदोदित जन्मभर
विसरलो शक्ती यशाची नेहमी देते हमी
- निलेश पंडित
२९ अॅाक्टोबर २०२३
कोणत्याही टिप्पण्या नाहीत:
टिप्पणी पोस्ट करा