वलय विरले आणि माफक दाटला अंधार भवती
उजळण्याची पूर्ववत् जग शक्यता सुतराम नव्हती
… नेहमी जाणून होते व्हायचे होतेच हे मी
परत ओहोटीत फिरणे संपता अंतास भरती
अल्पशा मोठ्या कधी तर कैक छोट्याशा अपेक्षा
फोल त्या ठरतील अन् घेतील जगण्याची परीक्षा
… लागली ग्रासू मनाला हीच चिंता जीवघेणी
हाय दैवाने दिली वाटे मला का घोर शिक्षा!
आजवरचे … वाटले … संपूर्ण जगणे फोल ठरले
भूतकाळाचा विसर पडला जणू ऐश्वर्य विरले
… फक्त त्यांचा एक केवळ शेवटी आधार उरला
प्रियसख्याचे शब्द जेव्हा नेमके ह्रदयात शिरले
केस दिसले दोन पिकलेले मला माझेच जेव्हा
तो म्हणाला, “डाय कर ना हे असे दिसतील तेव्हा!”
- निलेश पंडित
२ जानेवारी २०२४
कोणत्याही टिप्पण्या नाहीत:
टिप्पणी पोस्ट करा